Útbúgving sum entreprenørmaskinmekanikari

Útbúgvingarlongd: 4 ár

Ert tú til hvítar skjúrtur og reinar negl? So er hetta kanska ikki nakað fyri teg.

Men um tú ikki ert bangin fyri at fáa olju á hendurnar, skrúva ein motor sundur og fáa hann at virka aftur, so er entreprenørmaskinmekanikaraútbúgvingin júst nakað fyri teg!

Sum entreprenørmaskinmekanikari arbeiðir tú við stórum maskinum sum:

• Gravimaskinum
• Lessimaskinum
• Kranum
• Gummihjólslessimaskinum

Tú lærir at umvæla og viðlíkahalda maskinur og í summum førum eisini at framleiða egnar eykalutir.

Hetta krevur, at tú ert verkliga førur og hevur skil fyri m.a.:

• Motorum
• Hydraulikki
• Elektronikki
• Kjøliskipanum og drívskipanum
• Framkomnari feilfinning og stillingum

Skúlagongd: Danmark
Upptøkukrav: Tú skalt hava fylgt undirvísingini fram til fráfaringarroynd í fólkaskúlanum (9. flokkur)
Lønar- og arbeiðsviðurskifti: Sambært sáttmálum hjá handverkarafeløgunum
Eftir lokna útbúgving: Sveinabræv

Tú lærir at eftirkanna og umvæla maskinur innan byggivinnuna, eitt nú gravimaskinur, rennugravarar og kranar. Umvælingarnar kunnu eitt nú fevna um skift av motorum, stýriliðum, bremsum og koplingum.